Снежана Илиева–математичар и сликар: Победува жената која верува во себе

Денес разговараме со Снежана Илиева. Храбра со бројките, но уште посмела во движењето на четката, кога ги создава своите уметнички чеда. „Дијалог со стварноста и акварелот“ е насловот на нејзината изложба, која се реализираше во „Матица ексклузив“ во Скопје. Преку сликите се обидува да излезе од кафезот на својата душа.

За нејзиното сликарство академскиот сликар д-р Стојаче Тоциновски вели: „Илиева Снежана е многу успешен сликар на акварели. Тајната на нејзиниот успех се должи на генот што го поседува, храброста што ја има, преку потегот на четката и играта на водата и боите кои завршуваат во хармонична реална слика.“


Кажете ни некои основни навики што ги применувате секој ден? Како ви поминува времето?

Се трудам да го почнам денот со позитивни мисли и да го направам свој.

Станувам рано кога ќе се раздени. Уште во кревет медитирам и се посветувам на себеси. Потоа станувам и вежбам скоро цел час. Пијам задолжително чаша вода. Одмарам со чај или кафе, овошје или леб.


Претпладневните часови ми се најдрагоцени и исполнети. Секој ден имам друштвени и општествени задолженија. По враќањето купувам весник, со него одмарам и читам. По ручекот честопати сликам или пишувам и тоа навистина ме исполнува. По некој пат, навечер ги посетувам моите деца и внуци и водиме заеднички разговор.


Кој е вашиот мотив за да бидете успешна личност?

Научив да ги разбирам луѓето, да ги почитувам и да ги сакам. Содржината на животот ја гледам во работата.


Дали сте среќна?

Да! Задоволна и среќна.

Како ја дефинирате убавината, самодовербата и успехот?

Убавината е цел, вистински однос према сопствениот живот. Таа бара многу жртви, труд и одрекувања, а враќа со здравје и умствен мир.


Која жена победува?

Таа што мисли дека може.

И.С.