Втора конференција „Чувари на мудроста“ BACK 2 BACK: Спојуваме генерации раскажувајќи успешни приказни
На 11 јуни ќе се одржи втората конференција „Чувари на мудроста“, на која е предвидено да говорат истакнати бизнисмени, правници, архитекти, професори, музичари илуѓе од други области. Конференцијата е во организација на Халкбанк АД Скопје, а целта на овој настан е да се обединат и да се искористат искуствата и знаењето на докажаните и успешни професионалци во различни области за да се пренесат практични совети и мудрости на младите луѓе.
Целата дискусија е конципирана да се одвива во парови кои се од иста професија или со слична кариерна определба. Паровите ќе вклучуваат по еден искусен и еден помлад од фелата. Тие меѓу себе ќе треба да разговараат за определни прашања ставајќи фокус на нивната професионалност и на она што придонело за нивниот успех. Ќе ги споделат личните ставови и она во што веруваат. Публиката ќе има можност да слушне корисни совети за кариерен развој, но и за животната философија на говорниците од различни генерации.
„Луѓето се најголемата сила и највредното нешто што го има во која било професија. Затоа сакаме да ги мотивираме, да ги поттикнеме и да ги промовираме младите луѓе обезбедувајќи им простор за нивен креативен, професионален и личен развој. Менторството и давањето ветар во грб е една од работите што се исклучително важни при градење на кариера, а мудар совет е понекогаш водечка мисла на многу млади луѓе кои се на почетокот на својата кариера, истакна Маја Наумовска Савеска, директор на корпоративни и маркетинг-комуникации во „Халкбанк“ АД Скопје.
Втората по ред конференција „Чувари на мудроста“ BACK 2 BACK е важна поддршка и инспирација на младите професионалци и претприемачи. Оваа конференција не само што претставува поттик и храброст за младите и остварување на нивните планови, туку од неа ќе се пратат пораки за неопходноста од поголема самодоверба при чекорењето по професионалниот и по животниот пат.
Конференцијата ќе се осврне на неколку значајни теми: Што е клучно за успех од две различни перспективи; потоа особено важен предизвик со кој се соочуваат младите е како да изградиш кариера што преживува на долг рок; предизвикот на управување со времето, како и баланс на личниот и професионалниот живот.
Студентите ќе имаат можност да добијат дополнително стручни совети на големиот број работилници што ќе се реализираат во склоп на конференцијата.
Конференцијата е дел од поголемата кампања „Да ги слушнеме и гушнеме“, што започна во 2022 година, со намера да им даде глас на припадниците на повозрасните генерации. Во рамките на кампањата се спроведоа повеќе активности, настани и работилници во чиј центар беа пензионерите и повозрасните лица.
Повеќе информации за кампањата „Да ги слушнеме и гушнеме“ и за конференцијата „Чувари на мудроста“ се достапни на https://cuvarinamudrosta.mk/, а сите детали за настанот годинава може да ги најдете тука.
Влезот за сите студенти ќе биде бесплатен, со приложување студентска легитимација, но заради ограничениот број присутни, задолжително ќе биде пријавувањето преку следната онлајн форма: bit.ly/Конференција-ЧувариНаМудроста
ПР објава
