Ана Бунтеска: доцна е

Доцна е

За сите промашени љубови

Зборови кои останале в грло

Раце кои не се допреле

Здивови кои не се измешале

Доцна е

Проклето доцна за расправии

И со сам себе и со оние кои јад ти донеле

За лоши мисли и огнени префрлања

За твоето „прости“ и моето „простено ти е“

Доцна е

Многу е доцна за нови средби

И вино кое стои неотворено со години

Демек за поубави времиња го чувам

Времиња кои минуваат заедно со младоста

Доцна е

За вртење нов лист

Пишување на нечија туѓа тага

Опевање љубов која нема да се случи

Спомени кои мирисаат на нафталин

Доцна е

Смешно задоцнето е за да имаме наша песна

И допрва да учиме како се танцува во двојка

Телата за да ги извежбаме толку добро

За да дишат во просторот во кој нема воздух

Доцна е

За пцости од кои сѐ ќе е полесно

А срцето веќе нема да прескокнува

И душата нема к’о тупаница стегната да биде

И гласот нема да ми трепери

Доцна е

Премногу е доцна за да стоиш под моето пенџере

А јас к’о млада невеста озгора да те ѕиркам

Да си даваме ишарети кои само ние ги разбираме

И потем секој со мисла полна шаренила в кревет

да си легне

Доцна е

За да живеам со тебе втора младост

А ти твојата старост со мене да ја изврвиш

И за муабети празни за вечна љубов

Која и онака умира пред сите нас

Доцна е

За да се вратиме на минатото

И да мислиме на иднината

На сегашноста да ѝ се радуваме

И мигот со бакнеж да го запечатиме

Доцна е

За тебе со мене е веќе предоцна

А јас не ни мислам крај тебе да се будам

Ми остана само утрото со надеж да го чекам

Дека поарно ќе е

Дека ќе ми донесе мир и некоја нова мисла

Нова песна во која ќе те нема

Или во која барем нема да се познаеш

Доцна е

А толку проклето рано за ново утро

За Женски магазин, поетесата Ана Бунтеска

Фото: Стојан Стојановски