Денес е Свети Сисој Велики, најсилниот заштитник на децата: За нивното здравје, секоја мајка треба да го направи ова

Добивај вести на Viber

Православна црква и нејзините верници утре го слават празникот посветен на Свети Сисој Велики. Овој светител е исклучително почитуван и ценет од мајките и жените бидејќи го сметаат за заштитник на децата и брз помошник во секоја тага и неволја.

Многу мајки практикуваат пост 7 дена пред овој празник за да се причестат, а овој „седумдневен пост“ е непишано правило кое почнува да го почитува се поголем број мајки. Се верува дека на тој начин нивните малечки ќе бидат здрави и дека ќе бидат придружени со среќа во животот.

Ако утре врне, дефинитивно треба да ги оставите децата да трчаат надвор и да се навлажнат! Се верува дека тоа е водата што свети Сисој ја испраќа од рајот и дека така најдобро и најздраво ќе растат.

Постарите велат дека Свети Сисој е најголемиот истребувач од сите ѓаволи кои ги напаѓаат децата. Затоа, се верува дека утре децата можат да останат надвор навечер, бидејќи сите демони бегаат и се кријат. Народот вели дека се што ќе се роди на овој ден ќе биде среќно и долговечно.

Кој бил Свети Сисој?

Родум Египќанин и ученик на свети Антониј. После смртта на својот голем учител свети Сисој се насели на пустинската гора наречена Антониева според местото на подвигот на великиот светител. Земајќи врз себе тешки подвизи толку се скроти самиот себеси, што стана незлоблив како јагне. Затоа Бог му даде голема благодат. Можеше да исцелува болни, да изгонува демони и да воскреснува мртви. Свети Сисој се подвизуваше шеесет години во пустината и беше како извор на жива мудрост за сите монаси и мирјани што му притекнуваа барајќи поука. Пред смртта лицето му заблеска како сонце. Монасите стоеја околу него и ѝ се восхитуваа на оваа појава. А кога светителот ја испушти душата, одајата се исполни со прекрасно благоухание. Се упокои во длабока старост, во 429 година. Ги учеше свети Сисој монасите: „Какво искушение и да го снајде човекот, тој треба да ѝ се предаде на волјата Божја и да признае дека искушението се случило заради неговите гревови. Ако пак се случи нешто добро, треба да се каже дека станало по Божја Промисла“. Еден монах го праша авва Сисој: „Како да Му угодам на Бога и да се спасам?“ Му одговори светителот: „Ако сакаш да Му угодиш на Бога, излези од светот, оддалечи се од земјата, остави ја тварта, пристапи кон Создателот, соедини се со Него со молитва и со плач и ќе најдеш спокојство и во овој и во оној век“. Друг монах го запраша авва Сисој: „Како да го достигнам смирението?“ Му одговори Светителот: „Кога некој ќе се извежба да го признава секој човек за подобар од себеси, ќе го стекне со тоа смирението“. Амон му се жалел на Сисој дека не може да ги запомни мудрите изреки што ги прочитал и да ги повтори кога разговара со луѓето. Му одговорил светителот: „Тоа не е нужно. Потребно е да се стекне чистота на умот и да се зборува од таа чистота, полагајќи ја надежта во Бога“.