Подгответе ги орхидеите за зима: Четири клучни совети како да ја дочекате пролетта полна со цветови

Орхидеите се едни од омилените цвеќиња кои се чуваат во домашни услови. Овие цветни убавини придонесуваат за украсување на домот на посебен начин, но бараат и доста грижа, особено во зимските денови.

За орхидеите успешно да го преживеат постудениот период од годината и да ја дочекаат пролетта во полн цут, треба да им обезбедите посебни услови во текот на есента и зимата.

Изберете го нивното место внимателно

Познато е дека орхидеите ја сакаат светлината, но не и директната сончева светлина. Затоа, поставете ги саксиите со овие растенија во близина на директен извор на светлина, во просторијата со најмногу прозорци.

Грижете се за воздухот

Многу е важно да не чувате саксии со орхидеи на место каде што има провев. На пример, многу домаќинки избираат да чуваат орхидеи на прозорецот, но често го отвораат прозорецот, оставајќи ги саксиите со растенија на милост и немилост. Ова е причината зошто орхидеите почнуваат да губат пупки. Внимателно изберете го местото каде што ќе ги ставите саксиите со орхидеи.

Наводнувајте ги внимателно

Чувствителните орхидеи не сакаат премногу вода, но ниту премалку вода. Ако не знаете колку често треба да ги полевате орхидеите во текот на есента и зимата, обрнете внимание на лисјата и корените. Ако листовите се збрчкаат, време е да се напои растението. Истото правило важи и ако забележите дека коренот почнал да добива сивкаста или бела боја. Орхидеите секогаш наводнувајте ги со дестилирана вода која била на собна температура, а одвреме-навреме можете да им давате „инфузија“ од зелен чај.

Зголемете ја влажноста

Кога ќе дојдат есента и зимата, загревањето на просториите е неизбежно, а тоа претставува уште еден ризик за орхидеите, бидејќи не сакаат сув воздух. За да ја зголемите влажноста, од време на време прскајте ги со вода од шише со распрскувач. Добро решение е да наредите камчиња во основата на саксијата, да ги прелиете со вода и потоа да го спуштите садот со орхидеи врз камчињата. На овој начин ќе создадете мала влажна оаза во која орхидеите ќе напредуваат.