Што би рекле ако Хана е ваша ќерка? Можела да биде најпозната балерина, оставила сѐ за сопругот, родила 8 деца, молзи крави и прави сирење
Дебатата за „традиционалните жени“, таканаречената „trad
wife“ (етикетата се однесува на жените кои свесно ги прифаќаат традиционалните
родови улоги и кои сега живеат, готват и одгледуваат деца или жени кои се
спротивни на модерниот феминизам, во зависност од тоа кого ќе прашате), трае
веќе некое време.
Но, оваа недела, милиони интернет очи гледаа во насока на само една - Хана Нелман, попозната на социјалните мрежи како „Ballerina Farm (Балерина Фарм)“. Хана на барање на нејзиниот иден сопруг ги напуштила соништата да стане најдобрата балерина на светот, се омажила, родила осум деца и живее на фарма со сопругот.
Кој е Балерина Фарм?
Балерина Фарм е името на сметката на социјалните мрежи што ја користи Хана Нилман (34), жена со над 9 милиони следбеници на Инстаграм и уште 7,6 милиони на ТикТок. Таа е поранешна балерина образована во Џулијард, која израснала и е воспитувана по мормонизмот (религија која ја практикуваат мормоните и доминантна верска традиција на движењето на Светците од подоцнежните дни) и сега живее на фарма во планините на Јута.
Како и другите сметки кои промовираат традиционални вредности, Хана често објавува слики во карирани фустани додека подготвува домашен путер, сирење и оброци користејќи состојки од нејзината градина и фарма (која опфаќа 328 хектари) за да го нахрани големото семејство.
Кој е нејзиниот сопруг?
Даниел Нилман, кој исто така споделува содржини за животот на фармата на својот профил и има половина милион следбеници на Инстаграм, некогаш бил директор на компанија за обезбедување во сопственост на неговиот татко. Тој често објавува за работата на фармата, грижата за животните и целосното прифаќање на неговиот рустикален каубојски начин на живот.
Даниел исто така пораснал во мормонско семејство како едно од девет деца, а татко му бил милијардерот Дејвид Нилман, основач на авиокомпанијата JetBlue. Хана и Даниел се запознале на кошаркарски натпревар на колеџ, а првиот состанок го имале во авион откако Даниел дознал дека Хана ќе биде на летот на JetBlue од нивниот роден град Солт Лејк Сити до Њујорк и успеал да се префрли на следното седиште до неа. По еден месец врска се венчаа, а по три месеци таа за прв пат забремени.
Колку деца има Балерина Фарм?
Хана и Даниел имаат осум деца: 12-годишниот Хенри, Чарлс (10), Џорџ (9), Френсис (7), Луси (5), Марта (3), Мејбел (2) и Флора, која има шест месеци. Парот јавно изјави дека бременоста ја остава на молитва и Божја волја и не користат контрацепција. Исто така, седум пати се породила без епидурална во присуство на сопругот, а само првото породување било со епидурална анастезија, бидејќи Даниел тогаш работел на фармата и не бил присутен на породувањето.
Зошто луѓето зборуваат за Балерина фарма?
Откако Њујорк пост објави интервју со Хана и Даниел, многумина оставија загрижени коментари под објавите на Хана, прашувајќи се дали таа е навистина среќна со својот живот на фармата и дали тоа некогаш било нејзин избор. Сето ова е поткрепено со изјавата токму од ова интервју во кое Хана вели дека сакала да направи свое студио за танц од мала штала, но наместо тоа, шталата станала училница за нивните деца. Според написот, Даниел бара Хана да се грижи за сите деца без помош од дадилки и куќни помошнички, иако тие лесно можат да си го дозволат тоа. Даниел дури во тоа интервју изјавил дека Хана не можела да стане од кревет една недела поради умор.
Еден коментар на Инстаграм профилот на Хана, кој доби над 2.600 лајкови, гласи:
„Само што ја прочитав статијата и многу сум тажна за Хана. Ништо од ова не е она што таа го сакала, но таа го прави затоа што Даниел го сака тоа. Сè во нивниот живот е она што тој отсекогаш го сакал. Единственото нешто што ѝ било дозволено да го направи е да го зачува нејзиното име.
Другите се чувствуваа поинаку.
„Го прочитав написот и е јасно пристрасен. Авторот се обидува да го прикаже Даниел како контролиран сопруг, а Хана како жртва која се откажала од своите соништа. Ве молам. Јасно е дека овде има јасна пристрасност против женската одлука да се биде домаќинка.
А што мислите вие? Што би рекле ако Хана е ваша ќерка?
Фото и Видео: Инстаграм/ТикТок
