Учениците во „Пијанофорте“ се подготвуваат за завршните концерти и ќе заокружат уште една успешна музичка приказна
Во потрага по поведри приказни, патот нѐ однесе во приватното музичко училиште „Пијанофорте“ во Скопје.
Таму наидовме на огромна раздвиженост и звуци од различни мелодии и инструменти.
Нѐ дочекаа наставниците и иако беа зафатени, одделија малку од своето време да ни раскажат што се случува кај нив.
Велат дека сега се подготвуваат за два големи завршни концерти, но и за последниот циклус натпревари.
Имавме прилика да слушнеме една изведба од мал виолинист и на нашето прашање дали е тоа нивниот најдобар ученик тие ни одговорија дека имаат повеќе такви. Доказ дека е тоа така се купчето дипломи за освоени први и втори места на натпревари само од оваа пролет.
Нивните ученици се натпреварувале на повеќе меѓународни натпревари во земјава и во соседна Србија. Меѓу нив има 8 наградени пијанисти, 4 виолинисти а за прв пат се натпреварувале бендовите од одделот за популарни жанрови и освоиле три први места на натпреварот за поп и џез музика одржан во музичкото училиште „Сергеј Михајлов“ во Штип.
За крајот на разговорот им посакавме успех и во следните проекти и си заминавме со чувство на надеж дека нашата младина сепак има можност да создаде нешто убаво за својата иднина.
*Пр објава
