ФОТО РЕПОРТАЖА: Барселона, место кое мора да се види

Барселона важи за еден од најубавите градови во светот. Позната е по прекрасната архитектура на кој скоро никој не може да одолее. Медитеранската клима им одговара дури и на најпребирливите, кога е во прашање времето. Ова е град кој никогаш не спие. Така и ја препознаваат Барселона. Луѓето во овој град имаат свој ден на вљубените. Тоа е 23 април, ден кога мажите им подаруваат рози на своите сакани, жените пак возвраќаат со книга. Барселона е едноставна за да се снајдете. Улиците главно се вкрстуваат под прав агол во насока север-југ и исток-запад. Метрото е добро организирано и доаѓа на секои три минути. Картите за метрото чинат 2 евра и се купуваат на секоја станица. Барселона има богата историја, традиција и разни културни влијанија. Градот има седум плажи со вкупна брегова површина од 4.5 км. Плажите „Сант Себастија“ и „Барселонета“, се најдолгите и најпосетени плажи во Барселона. Барселона има 68 паркови меѓу кој најголем е „Parc de la Ciutadella“, каде што се наоѓа зоолошката градина. Најпознат пак е паркот Гуељ, дизајниран од Антони Гауди, во периодот од 1900 до 1914 година, кој е најимпресивниот и најневообичаениот парк. Со сите трговски центри како: Mare Magnum, El Corte Ingles, Diagonal Mar, L’illa, шопинг улици со бутици од најпознатите шпански брендови како: Zara, Bershka, Mango, Pull and Bear, Stradivarius, па сè до светски познатите брендови, Барселона нуди вистинска можност за шопинг особено во периодот од почеток на јули до крајот на септември, кога има големи попусти и распродажби, а цените се намалуваат до фамозни 70-80%. Магичната фонтана во Барселона е еден спектакуларен приказ на бои, светлина, движење, музика и акробатика со вода. Сите овие елементи помешани во една целост креираат чиста магија! Магичната фонтаната е нешто што мора да се види. За оние желни за адреналин, топло го препорачуваме забавниот парк Port Aventura, каде покрај возењето по лудите железници и ролеркостери, ќе можете да уживате и во оригиналните шоу-претстави. Оддалечен на 100-тина км од Барселона. Стадионот Камп Ноу е домот на ФК Барселона уште од неговата изградба од 1957 година. Со својот капацитет од 99.354 седишта, тој е најголем стадион во Европа и 12-от по големина во светот. Ла Рамбла е најшареното и најфреквентното шеталиште. Се наоѓа во центарот на Барселона и претставува одлично место за прошетка. Таа е преполна со улични артисти и тапас-барови. Бари Готик или Готскиот Кварт е еден од најстарите делови на Барселона. Тука посетителите имаат можност да ја истражуваат интересната архитектура и да почувствуваат носталгија по средновековна Барселона. Во овој дел од градот ќе најдете и голем број кафулиња, барови и продавници од познати брендови. Голем број од градбите во овој кварт се прогласени за светски културни споменици. Место кое никако не смеете да го пропуштите а да не го посетите е пазарот Ла Бокериа, пазар кој спаѓа во најпознатите пазари во светот. Тука се продава сè што сте виделе и она што не сте го виделе од овошје и зеленчук. Богата понуда на риби, месо, сувомесни производи, зачини, сирења, свежи сокови, разни слатка и џемови…Тука може и евтино да се јаде и да се пие. Во Барселона нема многу места каде што се нуди „Menu del dia“како во Мадрид. Не одете на најевтината варијанта од околу 8,5 евра оти е на границата на јадливост. Подобро да платите малку поскапо и да добиете нормален оброк. Инаку, на секој чекор ќе наидете на сендвичи од пршута (3 евра) и задолжително пробајте. Пршутите им се навистина одлични, но и со соленка цена. Ако сте љубител на морска храна, тогаш задолжително пробајте паеља-paellа. Нејзината цена е околу 16 евра. Насекаде во Барселона има огромен избор на вина и секаде го точат во чаши (околу 2 евра). Во Барселона често се пие и Cava – шампањско. Барселона е дефинитивно град во кој животот тече 100 на час. Таа енергијата наелектризирана со каталонскиот темперамент од првиот миг ви се вовлекува под кожа и ве носи низ лудите предели од градот, ви приредува незаборавни моменти и не ве остава на мир.