Ана Бунтеска: И оваа зима ќе мине
И оваа зима ќе мине
втора без тебе
а којзнае која без себе
со студ кој цела година трае
кој и на лето се носи
како другите наочари за сонце што носат
ете така јас во прстите од рацете
јануари го чувам...
И оваа зима ќе мине
со мирис на компот од дуњи
и замрзнати мисли во умот
со сеќавања кои имаат боја на изгазен снег
ракавици без прсти и раце без прегратки
со вкус на мраз во устата
во сите нијанси на сино
за јануари да го обојам...
И оваа зима ќе мине
покрај огништа згаснати
запретани љубови и мечти
студени срца и топли костени
воздушести чекори кои никаде не водат
изѕемнати носеви и растечени души
пареа од чај со лимон и мед
јануари на нане мириса...
И оваа зима ќе мине
безгласна и слепа
со слатка болка во градите
и празнина во стомакот
со љубов удавена во солзи
со главата горе дур срцето тоне
нова бразда кај усните
со горчина од мојот јануари.
За Женски Магазин, Ана Бунтеска
