Ана Бунтеска: Кажи ми
Еве, кажи ми
без да ме сожалуваш
без ниту еднаш да помислиш
дали надве ќе ме расечеш
и дали некогаш ќе можам
тие две половинки да ги закрпам.
Кажи ми на истиот начин на кој
убави думи ми кажуваше
со мирен глас и сигурни прсти
дур ракава и на сон ми ја држеше
ете така кажи ми дека не ме љубиш
без гласот да ти затрепери
или некоја буква да згрешиш
дека низ денот не ме мислиш
и дека во ноќите не ти идам
дека не ти недостасувам
и дека сепак сум била само привидение.
Кажи ми
со спокој и без колебање
кажи ми оти гласот мој не ти врти во умот
и дека секоја мисла за мене
ја оттурнуваш со раката
како досадна мува во жежок ден
дека не ти иди во барем еден миг
да ми раскажеш како денот ти врвел
и да ми се смееш оти за три минути
ќе ти го зовријам умот со дрдорење.
Еве, кажи ми,
кажи ми дека крајот го виде пред мене
и дека зад него не ти стојам дури ни ко сенка
дека си добро
10
Ана Бунтеска
дека тишината ти е лек
онака како што моето зборување ти беше.
Кажи ми,
кажи ми дека смешна сум што те пишувам
и дека на годиниве не ми личи вака што тагувам
дека ќе ми минеш
и дека некој друг поарен за мене ќе е
дека немало љубов со среќен крај
оти и онака крајот на што било среќен не е.
Кажи ми,
кажи ми дека ме одмина
и дека во широк круг и мислата за мене ќе ја одбегнуваш.
Кажи ми с`
освен дека вака поарно е
и дека така требало да биде
оти кај мене ниту поарно ќе биди
ниту вака требаше да е.
Кажи ми,
кажи ми дека луда сум
што по тебе уште боледувам
и дека нетокму сум
што вака песни распостелувам
само не ми кажувај да се обидам да те заборавам
и слепа и глува да сум дека не си ми се случил
и ти и ова што во мене боли,
само тоа премолчи го
само тоа не кажувај ми го
За Женски Магазин, Ана Бунтеска
