Ана Бунтеска: Не е дека...не е
Не е дека сонцето ќе изгасне
Како да е дотраена сијалица
Која деноноќно светела
За да не не’ проголта ноќта
Ниту е дека облаците ќе ги снема
Како глуварче во кое дете дувнало
Та се разлетува на сите страни
Како никогаш да не постоело
Не е дека дождот ќе пресуши
Како во сливник во кој заминуваат спомените
И никогаш не знаеш во која река
Рибите од нив ќе се заситат
Ниту е дека дрвата без корен ќе останат
Како живот во нив да не останал
Како шупливо стеблото да останало
Во кое има ехо од издлабени имиња
Не е дека ѕвездите ќе избледат
Како песна напишана со мастило
Која никогаш не стасува до љубениот
Или пристигнува предоцна
Ниту е дека музиката ќе занеми
Како старо радио од памтивек
Кое мемлосано седи во нечиј подрум
Приспомнувајќи си на поубави денови
Не е дека смеата ќе згасне
Како во немите филмови
Во кои главните глумци
Секогаш со бакнеж завршуваат
Ниту е дека земјата ќе престане да се врти
И дека се’ на неа ќе застане
Како вкочането да е времето
Она кое не работи во наша корист
Не е дека...
Ниту е дека...
Не
Не е дека нешто ќе се смени
И не е дека некој ќе знае
Оти имало некаде некоја љубов
Во која си бил ти
И во која моето име се спомнувало
И не е дека некому ќе му биде гајле
Ниту за тебе ќе го боли
Ниту за мене душата некому ќе крвари
Ама ете
Не е дека сеедно ми е
Ниту е дека сеедно некојпат ќе ми биде
Оти некои љубови болат
Дури и тогаш кога повеќе љубов не се
Или кога некој друг местото го пополнил
Она кое твое си беше
И она во кое сето мое постоење го збираше
Не е
Не е дека не ќе преживееме
Ама боли
Пусто, никако да помине
За Женски Магазин, Ана Бунтеска
