Ана Бунтеска: Таа знае

Таа знае кога е време да се разбуди

и рацете ширум да ги отвори

очите да ги избистри

светот во дланките да го зграпчи

боса да заигра

без грижа дали некој ја гледа

или потајно ~ се потсмева.

Таа знае

без никој да ~ каже

кога е време плеќите да ги свие

и во некое ќоше грбот да го навали

да ги пушти уздите

со кои животот си го држи

силно и цврсто како давеник

и во тебе засолниште да најде

за да се одмори.

Таа знае

кога на коленици да падне

и оздола милно да те гледа

со покорна насмевка да молчи

а сепак круната да си ја задржи

онаа која жена ја прави

која никој не може да ја згази.

Таа знае

знае точно кога да се исправи

и главата угоре да ја крене

со очи полни небо

и длабоко воздух да земе

за битката со себе што ~ претстои.

Таа знае

таа толку добро и проклето знае

кога е време за да замине

без ниту еднаш да се заврти

и ниту еднаш во тебе да погледне

иако душата кај тебе ја остава

без во ниту еден миг да се покае.

Таа знае

како да се залечи

и како своја повторно да биде

дури и тогаш кога во нејзиното јас

твоето ти се прпела

и знае кога е време да те исплаче

а попатно и себе со тебе

без да моли

со очи суви како пустина

и зборови кои на хартија ќе ги истури.

Таа

таа знае с`

дури и тогаш кога не знае како без тебе.


За Женски Магазин, Ана Бунтеска