Ана Бунтеска: Уште во градиве ми мрзне

мина зимата

неосетно

брзо

како украден миг

со забранет љубовник

како воздишки

кои испаруваат во воздухот

како зборови

изречени во среќни мигови

мина зимата

развлечена меѓу

нашите две гледања

студена како празнината

од твоето заминување

тивка како моето срце

дур со преплетени прсти те чекам

насмеана и растрчана

кога кај мене се враќаш

мина зимата

поткопана од смрт

на неколку драги души

растреперена од нови животи

и весел детски плач

љубовна и треперлива

дур се зачнуваат нови дечиња

полна исчекување

за збогум со смежуравени лица

мина зимата

со испишани страници

и плукнати зборови

со голтнати солзи

од мисли горчливи

со џагор и кикот

во постела со ќерка ми

со “сила дај ми”

уште малку, уште малку

мина зимата

малку ја сетив по студот нејзин

крцкање на снегот

и правење снежни ангели во него

и оваа зима мина

43-та по ред

во која љубев и губев

плачев и светев

се барав и наоѓав

за повторно да се изгубам

во која умрев и повторно се родив

ете, мина зимата

некако брзо, неосетно

а мене

мене уште во градиве ми мрзне

За Женски Магазин, поетесата Ана Бунтеска