Дарко Лешоски: Ништо не е скршено!
Еден поинаков концепт на поетот и сестран уметник Дарко Лешоски специјално за Женски магазин. Преку медиум- видео форма ги растура своите мисли- всушност „чудни“, необични зборови од секој светски јазик кои имаат длабоко значење, а тој се надоврзува на суштината на зборот со одлична нарација, умствена „гимнастика“ и визуелен опис.
KINTSUKUROI (глагол, потекло: Јапонски јазик) – “ да поправиш, да залепиш со злато“ - НИШТО НЕ Е СКРШЕНО!
Како раснеш ти учиш да не се бориш за никоја.
Ама баш за никоја.
Ти учиш да пуштиш.
Како раснеш ти не се разочаруваш ако си оди, ами ако остане - се вчудоневидуваш, оваа полуда од мене е - во себе си велиш.
Како раснеш ти учиш,
Ти учиш да не влечеш на јажето посилно за љубовта да ја задржиш.
Ти учиш дека само рацете ти така побрзо ќе си ги раскрвавиш,
и нема да можеш да дигнеш детенце во нив,
Како раснеш ти учиш за се друго освен за љубов да се бориш,
Ти учиш и знаеш, пополека ти појасно гледаш и спокоен си дека дури и ако ја довлечеш до себе - не значи дека ќе те баци.
Ами напротив.
Го спушташ јажето пред нејзини очи.
Како раснеш ти учиш да не ти е страв оној кој проштева побрзо и оној кој повеќе љуби - пак ти да си!
Како раснеш ти учиш да не се бориш за никоја и дека некогаш да пуштиш значи да задржиш, ама не да заробиш.
Како раснеш ти учиш дека нема љубов во никоја и нигде и дека не треба за неа да се бориш.
Ами ти дека си!
Самиот ти!
И чекаш.
И патиш.
И крвариш.
Некогаш долго.
Некогаш векови.
Ама не се сомневаш.
Не се сомневаш ни за миг кога ќе ја видиш.
И сите вистински љубови се викаат исто.
Сите се викаат исто ама баш исто : Како да ми се насмеа, како наеднаш се да ми даде, како наеднаш се да ми врати.
