(РЕЦЕПТ) Посна и вкусна компир манџа: Што да јадете за Велигденските пости
За подготовката на оваа превкусна компир манџа, потребни се следниве намирници:
- 1 средна главица кромид
- 2 чешниња лук
- 3 страка млад кромид
- 1 или 2 страка млад лук
- 3 моркови со средна големина
- 1 свежа пиперка (може и сува)
- половина тиквица
- третина модар патлиџан
- лаворов лист
-сол, црн пипер, црвен пипер
- масло за готвење
- килограм компир
Начин на подготовка:
Состојките почнувајки од кромидот ги сецкаме ситно. Исечканиот кромид го ставаме во тенџере во кое има ставено масло за готвење и го пропржуваме околу 1-2 минути, потоа ги додаваме лукот и младиот кромид и младото лукче. Пропржуваме, па го додаваме исецканиот морков. Откако убаво ќе се пропржи морковот ја додаваме исецканата пиперка, па тиквица и пропржуваме, го додаваме и модриот патлиџан, откако сите овие состојки ќе се издинстат, се додава и компирот исецкан во коцки или на полумесечинки (зависно како ви е послатко), се пропржува и тој, па се зачинува со сол, црн пипер и црвен пипер.
Додадете топла вода околу 1 килограм или до заливање на 2 прсти над состојките и оставете да се динста околу 40 минути. Во тенџерето додајте и лаворов лист.
П.С: Доколку имате замрзнати бамји, измијте околу 6-7 бамји, исецкајте ги и додајте ги во тенџерето, за подобар вкус и мирис кој ќе ве потсети на летото.
Сервирајте по ваш вкус, со туршија, лута пиперка или со свежа зелка салата и уживајте во денешниот ручек.
Бон апетит!
Фото: freepik
