Сопругата на британскиот премиер e бремена и најави доаѓање на „бебе на виножитото“: Овој термин има емотивно значење

Секоја бременост е време на чуда, предизвици, надежи, радости и стравови, но особено е тешка бременоста што се случува по несакан абортус, раѓање на мртво дете или слична трагедија. Во такви случаи, родителите често минуваат низ налети на радост што се заменуваат со чувства на тага, страв и темни очекувања.

Сопругата на британскиот премиер, Кери Џонсон, зборуваше за тоа деновиве, најавувајќи го доаѓањето на нејзиното „бебе на виножитото“ во декември. Таа и Борис Џонсон се веќе родители на едно дете, ова ќе биде второ дете за парот.

Што е „бебе на виножитото“?

Бебе виножито е бебе родено по спонтан абортус, по мртвородено дете или неонатална смрт - објаснува Џенифер Кулп Макаров, педијатар, појаснувајќи дека терминот „бебе на виножито“ означува време на нешто убаво што доаѓа по трагедија. „Создавањето нов живот по таква трагедија е вистинско чудо за родителите“, додава Кулп.

- Децата родени по загуба често го носат името „виножито бебе“ што симболизира надеж и светлина по темниот период. Исто така е важно да се каже дека виножитото не ја брише бурата што се случила пред виножитото. Родителите често знаат да чувствуваат ужасна вина бидејќи со нетрпение го очекуваат бебето што доаѓа, а мислат дека треба да жалат за детето што го загубиле - вели таа.

Пристигнувањето на „бебето на виножитото“ претежно носи измешани емоции. Мајките честопати чувствуваат мешавина од емоции, вознемиреност, страв и вина. Родителите се обидуваат да му оддадат почит на бебето што починало и во исто време го слават доаѓањето на здравото дете. Се жали и слави во исто време, што создава бура од измешани спротивставени емоции.

Родителите честопати се чувствуваат виновни што се радуваат, а детскиот психолог и психотерапевт Николина Милосављевиќ коментира вака:

„Многу е важно прво да ги дефинирате сите чувства низ кои поминуваат родителите и самите да си објасните зошто ја чувствуваат секоја од овие емоции. На пример, дали чувствуваат гнев кон животот затоа што тоа било неправедно кон нив, дали чувствуваат страв и се грижат за тековната бременост и раѓањето на идното бебе, без разлика дали таа бременост е во ред, и дали тие се чувствуваат виновни што чувствуваат среќа и возбуда поради доаѓањето на нов член на семејството. Кога родителите си објаснуваат зошто се чувствуваат вака, важно е да се прифати дека во таква ситуација, со толку голема загуба, е навистина нормално да се чувствуваат така. Она што исто така им помага на многу родители во оваа ситуација да поминат низ тагата и болката е тоа што тие не се единствените, и за нив е голема поддршка да бидат дел од групи за поддршка за сите оние што изгубиле бебе." 

Многу родители кои минуваат низ ова искуство, исто така, велат дека се многу поблаги кон „бебето на виножитото“ отколку што планирале. Причината за тоа е стравот, вината и вознемиреноста поради претходно искуство.

„Родителите кои изгубиле бебе пред доаѓањето на друго дете, можат многу понежно да ја покажат својата љубов кон детето, со силен акцент на поврзување со детето и докажување безусловна љубов, што е добро. Меѓутоа, во одредени ситуации, на пример, тие се повеќе склони кон вознемиреност, особено во ситуации на одвојување од детето. Еден процент од овие родители во ситуации на разделба, се грижат да не нешто се случи со детето без тие да можат помогнат, а оваа ситуација е неповолна за развој на независноста кај детето и го попречува нормалниот процес на разделување на детето од родителите - вели Николина Милосављевиќ за „Жена.рс“.

Што никогаш не треба да им се каже на родителите кои изгубиле дете?

Важно е да не ја намалувате нивната болка со реченици: „Издржи, ќе биде подобро, остани силна/ силен, не плачи“ или „ајде, сега ќе се роди ново бебе и ќе биде подобро“. Но, никој не може да остане силен во такви ситуации, дури и не е можно да се има само позитивни чувства за новата бременост, бидејќи спонтан абортус или губење бебе е болка и тага што трае цел живот. Ако родителите не сакаат да зборуваат за тоа и тоа е добро, но важно е да им кажете, иако можеби не ги разбирате целосно нивните чувства, дека вие сте таму за да ги слушате кога сакаат да разговараат “, истакнува Николина Милосављевиќ.

Важно е, посочуваат психолозите, родителите во таква ситуација да побараат помош за да го поминат тој период побезболно. Исто така, за нив е важно да бидат подготвени за фактот дека нивната тага ќе трае долго време и дека е во ред. Според психолозите, оваа тага ќе се појавува долго време и во различни интервали. Ако родителите забележат дека овие чувства го нарушуваат нивното секојдневно функционирање, важно е да побараат стручна помош.

„Секогаш е корисно да имате професионална поддршка со вас бидејќи тоа се луѓе кои се обучени да им даваат поддршка на луѓето во тешки животни ситуации на вистински начин. Секако дека е голем аларм кога родителот има самоубиствени идеи", заклучува Николина Милосављевиќ.