Ана Бунтеска: Чекаме
Чекавме нов ден
За да ни се разбудат мислите
Потем ноќта ја привикувавме
За да ја заспиеме осамата
Та ниту белилото од денот го видовме
Ниту сласта на ноќта ја сетивме
Чекавме сонце
За да ни осветли окото
Потем дождот го побаравме
Да ни засвежи во душите
Та ниту од сонцето ќар имавме
Ниту дождот спокој ни донесе
Чекавме тишина
За да ни стивне бурата во умовите
Потем џагорот го посакавме
За да не ни оглуви постоењето
Та ниту тишината нов здив ни донесе
Ниту џагорот смеа ни измами
Чекавме љубов
За живеачката да ја зачиниме
Потем бегавме во самотија
За себеси да се најдеме
Та ниту еден со друг се видовме
Ниту еден на друг во срцата си ѕирнавме
Откако умов ме служи
Ти и јас само нешто чекаме
И кога ќе го добиеме она по што пекаме
Веднаш нешто друго бараме
И ништо радост не ни донесе
Како заедно да не можеме
А еден без друг да не знаеме
И се вртиме во круг
Барајќи излез
Барајќи врата за од себе да избегаме
А на неа три катанци има
Еден твојата гордост
Вториот мојата суета
А третиот казна од Бога ни е
Оти бараме нешто што не знаеме да го чуваме
И колнеме се’ и сешто
Синкир некој друг виновен е
Оти клучот стално некаде го затураме
Еве си...и еве сум
Како глувци во тркало пикнати трчаме
За никаде да не стасаме
И чекаме
Само чекаме
Без да се дочекаме
За Женски Магазин, Ана Бунтеска
