Ана Бунтеска: Кротка љубов
Кротка љубовта да ти е
Како галеж
Како песна
Од која кожата ти се морничави
Како свила на голо
Во жежок и летен ден
Како воздишка од среќа
Меѓу тазе пеглани чаршафи
Нема ништо поубаво
Од кротка љубов
Во која брзање нема
Која е како море мирно
Чиниш тепсија е водата
А во неа рајот се огледува
Та душата да ти се одмори
Во таквата љубов да ти здивни
Небаре сите коцки на свое место се
Без да недостасува некоја
Од која сликата е непотполна
Кротка љубовта да ти е
Како збор нежен кој го шепотиш
И од кој утеха некому даваш
Како мисла со која ќе гоштеваш
И која спокој носи во тежок ден
Кротка
Кротка љубов да имаш
Оти за бура секој знае
И за бура секој умее
Ама да имаш некој крај себе
Кој кроткост ќе ти буди
Е како дома да си пошол
И како на своето да си дошол
Без ѕенѕање во утробата
Без страв во коските
Без прашалници во главата
И без немир во рацете
Кротка љубовта да ти е
И кон себе
И кон тој до тебе
Оти само кротката љубов вирее
И само таквата љубов за навек трае
И за време на живот
И после него
Та мир носи и во смртта
Оти останува и после неа
Само кроткоста во љубовта
Е она што човек те прави
Достоен за среќа
Достоен за љубов
Достоен за живот во љубов
За Женски магазин, Ана Бунтеска
