Ана Бунтеска: Мажот што го љубам (посветена)

Има мажи заради кои

ќе се подистајш од патот по кој одиш

и ќе ги пуштиш напред

пред тебе да одат

без помалку жена заради тоа да бидиш

Има мажи чиј збор ко планина тежи

и кои залудно зборој не фрлаат

низ ветар не ги растураат

ниту со нив ко пауни се дујат

Има мажи во чија сенка се навалуваш

и се препушташ оти заштитена си

ко дома после долг пат да идиш

кај него

а како кај себе да стасуваш

Има мажи кои од аждер-мачка прават

та наместо оган да блуеш

и правдина да тераш

околу него се вртиш и на сиот глас мјаукаш

и со глата в раце му се пикаш

Има мажи покрај кои мала сакаш да бидиш

толку ситна

за да можиш на гради да им легниш

и во ритамот на нивното срце, твоето да чука

дур не си појќе сигурна чие срце слушаш

Има мажи...ах, простете ми

има маж за кој песни везам

и кој сонот ми го зема

за кој матката ко улава ми вие

и телото ме боли

кој ме тера да мислам колку ми е мака

што помлада не сум за чедо да му родам

Има маж

има маж кој знае како маж да биди

и кој ме застанува кога безглаво некаде одам

чиј збор ме замислува

чиј глас ме растреперува

и кој не дека некојпат не го плашам

или дека не се касаме ко песој на зима

ама кој знај да кажи оти му фалам

и кој мојот инает го скротува без камшик

чие присуство ми треба за да сум своја

без да ми е мака што негова станувам

Има маж

има маж кој ме буди

и кој ме успива со вистината

кој тука е и тогаш кога сама сум

и заради кој во боја сонувам

Има маж...го има

заради кој ѕидови рушам без збор

и како кокона пред огледало висам

има таков маж, има...мажот што го љубам


За Женски Магазин, Ана Бунтеска