Ана Бунтеска: нема лесна осама, ниту лесна љубов

Ниту една осама лесна не е

ама ми се чини дека нема потешка

од онаа на која сам ќе се осудиш

да ти замрзне срцето

и околу душата ѕид да кренеш

оти него ништо не го руши

освен ако еден ден сам не ти текне

дека не само што никој да влезе не може

туку и ти да излезеш веќе не сакаш

нема

нема лесна осама за оние кои љубов сакаат

а од пусти страв ја бркаат

и од неа бегаат без да се завртат

та на сето трчање веќе сеедно станува

и така низ животот протрчуваат

и трчајќи в гроб легнуваат

се чини дека нема ништо поболно од осама

од онаа која во себе ја имаш и кога со некој си

та се лажиш себеси

и него го подлажуваш

а и тој тебе по малку

па ретки се миговите кога воздухот околу вас

е полн смеа, воздишки и треперења

па наместо радост дишете горчина

згусната како маглата во Скопје

и во неколку квадрати бегате еден од друг

небаре три стола и една маса се барикади

ех

нема лесна осама

како што нема ниту лесна љубов

и ниту едно ЗАЕДНО лесно не е

и ај биди мудар и одбери

ете одбери сам да не си

ама одбери со срце, кој љубов ќе ти е

а со умот работи за да не овене пустата

јас еве мудра не бев

низ животов сама бев

некогаш дури и сама без себе

а сега колку појќе себеси се имам

срцево к’о да ми се затвора

к’о само жива ограда да си крена

оти умот не го вклучив ко’ требаше

за да го зачувам и галам

за пријател да му бидам

па ме казнува сега со ѕидови и бедеми

и не дава никој до него да стаса

ниту пак тоа да потрча во нечии раце

нема

нема живот без осама

ниту пак живот без љубов има

а и љубов без душа

а душата без ум не се чува

и ај сега

ај сега на старост учи го она што не си научил

ко’ требало

па отвори срцето

пушти ја душата да пее

и умот, аман умот вклучи го

за да се сакаш дур’ него го сакаш

и да се сакаш ко’ ќе те отсака

осамата за да не те изеде

оти нема

нема ништо поболно од осама

ништо

За Женски магазин, поетесата Ана Бунтеска