Ана Бунтеска: Се надмудруваме
Се надмудруваме
со наизуст научени фрази
наместени насмевки
извежбани гестикулации
кревање на веѓите
прчење на усните
се лажеме себеси
лажејќи ги сите околу
и тераме
денови, години, децении
полни лажна ведрина
и изрешетани срца
крпеници во душите
талог во мислите
се надмудруваме
со животот игри играме
убедувајќи се дека сме доволно вешти
смртта за да ја прелажеме
и колку повеќе тела околу
толку поосамени сме
со стакла во очите
и мразулци во прегратките
дур' еден ден бело знаме не кренеме
и сета бедотија зад нас ја оставиме
и почнуваме да живееме
и љубиме
ете онака како што секогаш што сме посакувале
без кантар до себе и кусур да фаќаме
од срце распослано ко' ливада
за да ни трча љубовта
и душа на тацна ставена
оти чуму ти е ако ја заклучиш
и ѕидови околу неа изградиш
на самотија ја осудиш
без храна и вода
без пилето во неа да ти пее
се надмудруваме
пазариме, мериме и броиме
дур' не се предадеме
дур'она што ни е пишано не го изживееме
со надеж и ронки страв
дека можеби предоцна е
за да живееме
за среќни да сме.
За Женски магазин, поетесата Ана Бунтеска
Фото: Стојан Стојановски
