Ана Бунтеска: Во твоите раце
Во твоите раце
Ги ставив сите мои сни
Удобно ги сместив надежите
Ги легнав копнежите
Поднаместени по азбучен редослед
За полесно да ги читаш
Во твоите големи дланки
Ги сместив моиве скоро 50 години
Како војничиња играчки на мало дете
Кои наизуст по име ги знае
И кои никогаш не остануваат на бојното поле
Поразени или убиени
Во твоите дланки
Широки колку небото над градов
На кое се назира полната месечина
Се стуткав како фетус
Чекајќи времето да му дојде
За да се роди од нечија солза радосница
Во твоите раце
Во твоите големи и широки дланки
Сиот мој свет го собира
Како да е шака џамлии
Светкави и шарени
Низ кои улиците сјаат со спокој
Во твоите дланки
Кои за разлика од моите
Секогаш се меки и топли
Го поднаместив грбот
Како милениче кое се мести за галење
Без ронка страв дека избркано ќе е
Во твоите големи дланки
Во чија вдлабнатина
Моето тело поприма друг облик
Ги оставив коскиве
Како во ковчег кој за мене е правен
Токму по мерка како по нарачка
Твоите дланки
Толку топли како сомун леб
Изваден сега од печката
И толку големи
Како дом во кој безбедна сум
Ги оставив сите песни и зборови
Без срам за да ти кажам колку те љубам
И без двоумење дали ќе ме разбереш
Кога по тебе пекам како дете
Или кога се лутам што до мене не си
Ете
Само таму се сместив
Знаејќи местото каде ми е
Со сета тежина која во душава ја носам
Со срце обелено
И црвени коси кои низ прстите ти бегаат
Твоите големи дланки
Твоите толку топли и широки дланки
Држи ги стиснати
Силно и цврсто
Не испуштај ме
Не испуштај ми ја љубовта
За Женски магазин, поетесата Ана Бунтеска
