Ана Бунтеска: Барам збор
Сакам нов збор да најдам
некој кој досега никогаш
во песна не сум го ставила
само еден единствен збор
со кој цел свет на дланка ќе го зберам
и како дете срамежливо
со погледот в земја вперен
ќе ти го подарам
како сосем неважно да е
што во ритамот на тој збор срцето ми чука.
Сакам збор
и низ умов пребарувам
само еден единствен збор
со кој ќе можам с` да ти кажам
и со кој фермани повеќе не ќе пишувам
таков кој сета ЈАС
во сиот ТИ ќе се претопи
и нема да знаеш каде почнуваш
или каде јас на тебе се надоврзувам
и збунет ќе си дали имаме две тела со еден ум
и дали некој се поиграл со нас
та едно срце надве пресекол
и едното кај тебе чука
а другото кај мене пее.
Барам збор,
само еден и единствен,
со кој ќе знаеш дека душава по тебе квичи
и дека сите сокови за тебе ми течат,
збор со кој ќе ти речам
дека моето „своја“ не крвави
оти сакам и твоја да бидам.
Ете, таков збор ми треба
со кој сите други ќе избледат
кој ќе светне како жена што љуби
во преполна соба кога ќе влезе
и сите погледи на неа застануваат
не оти е најубавата
не оти е единствената на светот,
туку оти љубовта која со себе ја носи
сите на коленици ги фрла
и раздава,
раздава и преку поглед покорува.
Збор,
само еден збор низ себе барам
со кој те љубам ќе ти кажам
додека умирам
додека секој ден повторно се раѓам.
За Женски Магазин, Ана Бунтеска
