Ана Бунтеска: Еден и единствен збор
Ете,
не успеав збор да најдам
со кој нашето ќе го опишев
или во него себе и тебе да н` зберам
та само од тој еден збор книга да ти напишам
во која нема да можеш да го доброиш
или, пак, ќе почнеш
па на пола пат раце ќе кренеш
и луда ќе ме наречеш.
Ете,
колку умов и да врти
таков збор не успеа да роди
и од него приказна за нас да сплетев
оти за други плетки рацеве не знаат
та цел чаршаф од еден збор ќе исткаев
доволно топол за на зима
и доволно тенок за по горештини да се покриеш.
Ете,
на сета моја љубов
таков збор не најдов
ниту веќе го барам
оти јас, па, и не знам со збор да ти кажам
дека ми фалиш до бол
и дека болката веќе друга димензија има
дека се шири и собира ко жива да е
ко дете расте и се развива
ама, ете,
не ~ се радувам ко мајка на чедо
ниту сакам да потпорасне уште малку
оти и ваква чуму ми е
иако само ~ молчам
и не се обидувам да ја излечам
само чекам
и жива да не сум ако знам што чекам
ниту знам кога ќе мине
а уште помалку и дали некогаш ќе ми минеш
та ја прифаќам како нешто од што бегање нема
и само надеж имам
дека едно утро ќе се разбудам
со нов збор во умов
кој сиот бол ќе го замени
и кој дупкава во градиве ќе ја пополни
кој ќе успее да ме залечи
кога веќе сама не знам и не можам
тој еден збор
еден и единствен
во која сета моја љубов ќе ја собере
За Женски Магазин, Ана Бунтеска
