Голем е денот
![](/media/main/2024/05/20240501213947.png)
Голем е секој ден
Во кој жив зачекоруваш
И го вдишуваш гладно воздухот
Како никојпат дотогаш
Како да не било исто
За само едно деноноќие
И во главата несвесно
Молитва си везеш како монистра
До Бога, до Универзумот,
До нешто или до некого
Како благодарност дека тука си
Дека уште тука, на овој свет си
И дека имаш можност
Сите грешки од вчера
Да не ги повториш утре
И сите желби неостварени вчера
Да ги оствариш утре
Та среќен си и мирен во душата
Дека сета премолчена љубов вчера
Ќе ја изустиш простум утре
И дека за секој грев сторен вчера
Прошка ќе побараш утре
Секој ден голем е ако чоек си
Ако знаеш срце да си отвориш
И во него јад да не чуваш
Ами само топлина и медовина
Чунки она си што срцето ти е
Секој...
Секој ден голем е
Ама има денови поголеми од сите други
Во кои се свестуваш оти минлив си
И оти не ќе бидеш вечно тука
Денови во кои се’ станува толку јасно
Како да си го гледаш животот озгора
И тогаш знаеш...
Тогаш како да се будиш од сон-кошмар
И зад себе оставаш суета
Оставаш се’ што товар ти било
И однатре и однадвор се чистиш
Та си велиш добро е
Ете, на овој ден научив нешто за себе
Секој ден голем е
Во кој уште имаш прилика да љубиш
И во кој уште има некој да те прегрне
Ама има денови
Кои поголеми од другите се
Во кои учиш себе да се љубиш
За да знаеш
За да умееш
И ближниот свој да го сакаш