Максим е одлично прифатен од другарчињата, оди на родендени и тие доаѓаат кај нас: Бранка од Радовиш за Светскиот ден на лицата со Даунов синдром
„Постојат деца кои се раѓаат со еден хромозом повеќе-21-от. Ништо посебно еден повеќе или помалку не е битно.
И некои луѓе велат дека поради тоа овие луѓе имаат помалку од другите. Јас би рекла дека имаат многу повеќе!
Имаат искреност, добрина и топлина која ниту јас ниту ти ја имаме. Името им е ЉУБОВ.
И знаете ли дека тие не се поинакви туку ние сме! Затоа што ние не го сфаќаме животот во вистинска смисла на зборот, а тие се вистински благослов.
Лицата со даунов синдром ги менуваат луѓето што ќе ги сретнат, ги топат тврдите срца, безусловно сакаат...“. Ова е пораката на Бранкица Јованова од Радовиш која е супермајка на малиот Максим кој во февруари наполни 8 години.
Минатата година, Бранкица, за Женски магазин, ја раскажа нејзината приказна за животот со Даунов синдром на синчето Максим .
Воопшто не помислувала дека ќе роди детенце со посебни потреби, а кога за прв пат го земала во прегратки новородениот син во глава ѝ се вртеле само мислите дали ќе успее да го изнесе Максим на вистинскиот пат.
„Кога за прв пат го земав во прегратки си реков зошто баш ти, што сум згрешила за вака да бидам казнета. Но, гледајќи го како расте, која искрена и чиста љубов ја има, желба и упорност за живот, си реков па јас сум го добила најголемиот дар од Бога“, вели оваа силна мајка.
И покрај сите потешкотии со кои се соочувале родителите на Максим не се предавале. Тие се силни борци, кои секојдневно му благодарат на Бог за бескрајната љубов со која им го подарил Максим.
Максим денес е прво одделение. Неговата мајка ни раскажа дека одлично се снаоѓа во училиште а најдраго ѝ е што е прифатен од другарчињата без никакви предрасуди. Ја има и сестричката Деана која исто така му е голема радост и среќа, а и најголем другар.
„Максим е супер, одлично е прифтен од неговите другарчиња и со асистентката одлично се вклопени. Другарчињата сакаат да дружат со него, го покануваат на родендени, а и тие го испочитуваа и дојдоа на неговата забава“ - ни раскажа кратко Бранкица.
Даунов синдром е резултат на тоа што има уште еден хромозом во клетките на детето. Наместо 2 хромозоми кои го сочинуваат 21-от пар, овие деца имаат 3 хромозоми во нивните клетки (од кои 2 го сочинуваат 21-от пар, а еден е екстра), поради што Даунов синдром се нарекува уште и трисомија 21.
Името Даун доаѓа од името на англискиот лекар Лангдон Даун, кој во 1866 година прв го опишал синдромот кај своето дете, а дури во 1959 година е утврдено дека причината за овој синдром е трисомија.
Во 95-97 проценти од случаите, Даунов синдром не е наследна болест и се јавува кај сите раси и економски групи. Во просек, едно од 1.000 или едно од 1.100 деца се раѓаат со овој синдром во светот.
Степенот на тешкотии со кои се соочуваат луѓето со овој синдром варира, но во секој случај тоа вклучува интелектуални тешкотии (просечниот коефициент на интелигенција е помеѓу 25 и 80), тешкотии во учењето, доцнење во развојот, можни здравствени проблеми и карактеристичен физички изглед.
Во 1929 година животниот век на лицата со Даунов синдром бил 9 години, денес благодарение на навременото дијагностицирање и лекување на природните аномалии нивниот животен век е продолжен до 50 и повеќе години.
„Го славиме овој ден за да ја подигнеме свеста и разбирањето и да обезбедиме меѓународна поддршка за подобрување на состојбата на лицата со Даунов синдром, а со тоа и квалитетот на нивниот живот. Сакаме да ја поддржиме нивната интеграција во поширокото општество, да им обезбедиме место во градинките, училиштата и работните места“, се главните пораки на одбележувањето на овој Ден.
Она што можете да го направите денес за да покажете поддршка и љубов кон лицата со Даунов синдром е да носите долги шарени чорапи, чорапите се земаат како симбол затоа што по форма се слични на хромозомите.
Ирена Ставрова
