Сите плачеме: Фотографија од соблекувалната, вака клубот се прости од Андреј Лазаров кој настрада во Кочани
Андреј Лазаров, поранешен младински репрезентативец на Северна Македонија и играч на Шкупи, почина од изгореници и вдишување чад откако избувна пожар во дискотека во Кочани. Сега клубот на најтажен начин се прости од него.
Во пожарот загинаа 59 лица, а меѓу нив е и Лазаров.
Според првичните информации тој настрадал додека се обидувал да им помогне на другите да ја напуштат дискотеката.
Неговиот клуб се огласи со најтажната фотографија од соблекувалната. На местото каде вообичаено седеше Андреј, сега му висеше дресот.
Неговите соиграчи беа во солзи или само немо гледаа напред. Многумина заплакаа кога ја видоа оваа фотографија која покажува колку им недостасува Лазаров.
Вака Шкупи зборуваше за неговиот херојски чин.
„Иако однапред имавме информации од неговото семејство дека е добро, со длабока болка и голема тага, соопштуваме дека меѓу настраданите во трагичниот пожар што се случи ноќеска во Кочани, е и нашиот фудбалер Андреј Лазаров.
Како херојската душа што беше, Лазаров го загуби животот обидувајќи се да им помогне на другите да побегнат од огнената стихија. Тој беше отруен од чад при обид да спаси животи, покажувајќи храброст и хуманост до последен момент.
Неговиот херојски чин засекогаш ќе остане во нашето сеќавање како доказ за неговиот благороден карактер и неговото големо срце. Ова е огромна загуба за нашиот клуб, соиграчите и целата фудбалска јавност.
Зборовите се недоволни за да се опише болката што ја чувствуваме во овој момент, во оваа една од најголемите трагедии во историјата што го снајде нашиот клуб! ФК Шкупи изразува најдлабоко сочувство до неговото семејство, роднините и целото големо семејство на нашиот клуб. Андреј беше дел од Шкупи само шест месеци, но неговото име засекогаш ќе остане неизбришливо како дел од нашиот тим. Споменот за него засекогаш ќе остане незаборавен во нашите срца!“, стои во соопштението од Шкупи.
ФОТО: Официјален профил ФК Шкупи
