Инспиративни и успешни- херои на денешницата: Цако, Беки, Роза, Ема, Јане, Искра - лица со попреченост за кои не постојат граници

Меѓународниот ден на лица со попреченост се одбележува секој 3-ти декември. По тој повод, денеска се потсетуваме на хероите кои се наша секојдневна инспирација и за кои во животот нема пречка за остварување на соништата.

Александар Матовски- Цако

Фото: Приватна архива

Александар Матовски, познат како Цако, е младо и сестрано момче со Даунов синдром. Тој е еден од танчарите од танцовото студио „Dancers United MK“ кои го освоија првото место на Светското првенство во модерни танци кое што се одржа во Киелце,Полска. 

Цако е творец на поезија, водител на своја радио-емисија и секојдневен борец за човековите права. Неговото семејство е негова најголема поддршка, особено сестрата Марија. Таа се појавува како верен придружник на Цако на многу настани, меѓу кои и Светската конференција во седиштето на Обединетите Нации во Њујорк, каде тој ја раскажа својата приказна како прв македонски студент со Даунов синдром. 

Цако за денешниот ден имаше своја порака до пошироката јавност:

Беира Салифоска- Беки

Беира Салифоска, позната како Беки, има глауком (целосно оштетување на видот од раѓање), препознатлива насмевка и магични раце. Оваа млада и позитивна девојка потекнува од Пласница, а веќе повеќе од 12 години живее во нашиот главен град, од кои 10 работи како масерка во Институтот за физикална и медицинска рехабилитација во Скопје.

И во време на вондредна состојба во нашата држава поради КОВИД-19, Беки секојдневно работи со своите пациенти, но и ги почитува препорачаните мерки за заштита. 

- Драги мои, ви посакувам многу здравје, што побрзо да ја надминеме оваа криза, посакувам да заврши во најдобар ред, да се видиме сите среќни и здрави и да се изгушкаме и да надохнадиме за времето кое сме го поминале во изолација. Ве сакам многу и останете дома, заштитете се себеси и сите околу вас, седењето дома ќе помогне на сите- порача Беки.

Роза Мојсовска

Фото: Приватна архива

Често луѓето кои имаат хендикеп, знаат да влеат мотивација дека секој ден од животот е важен и дека сите ние сме посебни на свој начин. Така беше и кога уметницата Роза Мојсоска која има редок талент да црта со уста, ја сподели својата емотивна приказна со Женски Магазин. Таа има телесен инвалидитет и од 1976 година живее во Заводот за рехабилитација „Бања Банско“ во Струмица. 

Нејзината успешна сликарска приказна почнува токму во еден од тешките периоди од нејзиното детство, кога на 7-годишна возраст, на осми март сите дечиња цртале честитки за празникот а таа не можела. Тоа било мотив да је земе боичката во уста и да нацрта цвет, од кој се воодушевиле сите.

Ема Ананиевска

Фото: Фактор.мк

Ема Ананиевска е 22-годишна девојка и студентка на ФМУ, препознатлива по своето пијано. Таа слепа е целиот свој живот, но живее среќен инклузивен живот благодарение на својата инклузија во редовниот образовен систем, упорноста на нејзините родители и поддршката од професорите и другарите.

Музиката вели е нејзината најголема љубов. Талентот кај неа од најрана возраст го препознале нејзните родители кои се нејзина најголема поддршка, а потоа и професорите.

Ема е успешна млада личност, срдечна, ведра и едноставна која упатува порака- „Почитувајте ги различностите затоа што сите сме различни на свој начин!”

Јане Велковски

Фото: Вангел Тануровски 

Малиот херој кој боледува од сплинална мускулна атрофија, Јане Велковски е роден во Скопје на 29 јули во 2008 година. Околу својот прв роденден, тој е дијагностициран со Спинална Мускулна Атрофија- тешко невромускулно заболување за кое во тоа време не постоеше терапија. Учи во Подрачното О.У. Димитар Поп-Георгиев Беровски во населбата Хром, Скопје, во седмо одделение. 

Беше и дел од добитниците на посланијата „Св. Мајка Тереза“ за 2020 година и статуетки за хуманост од Граѓанската Асоцијација „Скопјанката Мајка Тереза“.

Има учествувано во повеќе хуманитарни настани за подигање на свеста за ретки болести, кампања за обезбедување на терапија за Спинална Мускулна Атрофија, номинација за млад пациентски застапник во ЕУРОРДИС, учесник во кампања на УНИЦЕФ Македонија- „За секое дете,права“, настап на главен настан на УНИЦЕФ Македонија „Биди фер, за детство без пречки“, кампања на УЕФА за еднаквост на теренот- „Equal game“. Јане беше прогласен за Амбасадор на фудбалот од страна на ФФМ во 2018г.

Во Ноември минатата година,  Јеше поканет да говори на глобалниот самит пред Генералното Собрание на Обединетите Нации во Њујорк, САД, во рамките на одбележување на светскиот ден на детето и 30годишнина од усвојување на Конвенцијата за правата на детето. Неговиот говор беше препознаен насекаде во светот како силна порака за еднаквост преку отстранување на бариерите и стоп на дискриминацијата.

Искра Донева

Фото: Вангел Тануровски 

Поетесата Искра Донева 37 години се бори со церебралната парализа, но иако нема контрола врз мускулите и движењето постојано се обидува да има контрола врз општествените промени. Има редовна работа, две магистерски и не престанува да пишува. 

„Јас сум вака родена, тоа не е мој избор. Меѓутоа, како општеството одговара на тоа, е тоа е вистинската попреченост. Оти, ова е само состојба којашто може да се поправи или оправи и да биде прилагодлива.“

Р.Ж.М.