Ана Бунтеска: Земјо моја љубовна
Колку што си ти голема
Толку сме мали во умовите
Колку што си ти достоинствена
Толку сме недостојни за тебе
Колку што си ти богата
Толку сме сиромави во срцата
Колку што си ти несебична
Толку сме стиснати во душите
Колку што си ти дарежлива
Толку сме грабливци ненаситни
Колку што си ти плодна
Толку ни скапува семето
Колку што ни ги простуваш гревовите
Толку поголеми грешници сме
Земјо моја љубовна
Земјо моја напатена
Земјо моја...непребол
Те плукнавме
Те згазивме
Те искрадовме
Те огрдевме
Те распарталивме
Те онемевме
Те ослепевме
Те прелажавме
Те предадовме
Земјо моја љубовна
Земјо моја напатена
Земјо моја...непребол
А ти...
Дом ни даде ко закрила
Земја ровка ко постела
Небо ко прекривка
Овошки за најаска
Вода изворска ко нектар медена
Жито за тазе леб
За ненајадени да не останиме
За жедта да ја изгасиме
Да има каде да се вратиме
Коските во твоите пазуви да ни ги закопаат
За да не ни се запусти името
За да не ни го избришат презимето
Земјо моја љубовна
Земјо моја напатена
Земјо моја...непребол
Бел ден од нас не виде
Дерман не ти дадовме
Како да не си ни една и единствена
Како да може човек без дом да преживее
Како да не ќе останиме сирачиња без тебе
Замјо моја љубовна
Земјо моја напатена
Земјо моја...непребол
На сета нељубов кон тебе
Уште со љубов ни враќаш
