Ми остави аманет да не бегам од корените: Искрено со синот на Војо Стојаноски
Растеше со народната музика и природно ја чувствува и ја интерпретира. Дамјан Стојаноски, синот на легендарниот Војо Стојаноски, направи сериозен пробив на домашната фолк-сцена. За неговиот татко кој почина на 6 мај 2014 година, на само 20 дена пред неговата матура, пред неколку месеци за „Женски Магазин“ зборуваше во суперлативи.
- Ми беше најдобар пријател, ментор и идол. Неговите дела никогаш нема да бидат заборавени. Во иднина сакам да препеам дел од неговиот богат репертоар. Татко ми сними многу убави песни, но некои поминаа понезабележително, па планирам да ги оживеам - ни откри тој.
Војо Стојаноски остави голема трага во македонската народна музика. Дамјан вели дека бил одличен родител.
-Секогаш ме советуваше да се надградувам, но да не бегам од коренот. Мислеше дека ќе може да даде уште многу во музиката и планираше солистички концерт. За жал, не успеа да ги реализира тие идеи - ни раскажа пејачот.
Дамјан студира на Факултетот за музичка уметност во класата на Горан Нацевски на отсек-соло пеење. Вели дека воопшто немал дилема која професија да ја одбере бидејќи отсекогаш ја сакал музиката. Фолк-ѕвездите го знаат од дете, но сега го прифаќаат како нивен колега.
Ѓ.С.
