Ана Бунтеска: Ете само толку треба
Утрото да осамне
Со немирен вкус на живот
Мирис на жешко кафе
Кое ги скокотка сетилата
Неколку колачиња со цимет
Чии ронки се губат во килимот
Детска смеа
Чиниш ѕвончиња слушаш
Топла прегратка
Од која знаеш дека се’ ќе е во ред
Мислата дека жива си, тука си
И тивко благодарам кон универзумот
Два реда муабет со сродните души
Чиј збор е како мелем на рана
Омилената песна на радио
Која несвесно ја потпевнуваш
Спокој низ денот
Кога знаеш дека има надеж
Чист образ
Кој ќе го оставиш во аманет
Кристална мисла за убост
Исполирана за да блесне во сивилото
Подадена рака
Кон оние кои помалку среќни од тебе се
Стисок на две срца со ист ритам
Меѓу погледи полни љубов
Исчитана страница од книга
Во која главниот лик си ти
Завртен грб на злобата
Од која како ѓаол од крст бегаш
Отворени дланки и дарен цвет
За да ти замириса секојдневието
Ноќна тишина и чаша бело вино
За да го испратиш ДЕНЕС
Поглед вперен кон УТРЕ
И тивка молитва да го дочекаш
Лесен сон
Како пердув од бела птица
И љубов
Немерлива и искрена
Кон себе
Кон ближните
Кон животот
Толку треба
Ете само толку ми треба
Толку ти треба
Толку ни треба
За Женски Магазин, Ана Бунтеска
