Повеќе свадби отколку разводи за овие пет години: Кои познати Македонци се заколнаа на вечна љубов, а кои ставија крај
Женски магазин не би бил женски ако не ги следи и естрадните и познатите личности. За овие 5 години колку што постоиме во интернет сферата, се крунисаа многу љубови, но, се распаднаа и неколку естрадни бракови.
Љубовта им цветаше, и сѐ уште им цвета на многу од оние кои се заколнаа пред Бога, а разводите ги имаше во помал број. Венчаници од соништата, невести како од бајките, распослани велови, уникатни приватни забави, пејачи, ракометари, министри и портпароли во елегантни костуми.
Во редовите подолу ве потсетуваме на нашите ѕвезди кои „скокнаа во тавче“ а кои Женски магазин ги следеше од своето постоење.
Дама која меѓу последните годинава стапи во брак е Викторија Лоба. Ако некоја од пејачките некогаш изгледала како божица на сопствената свадба тогаш тоа дефинитивно ѝ го препишуваме нејзе. Облече две венчаници, пред Бога на вечна љубов на бизнисменот Ѓорги му се заколна во Охрид, а не се двоумеше и да го земе микрофонот во раце за да ги забавува гостите на веселбата.
Македонското девојче, чија свадба со години се очекуваше со нетрпение, Каролина Гочева и Михаил Корубин се венчаа на 23 септември, 2017 година. Свадбата на Каролина и на Михаил беше проследена од будното око на јавноста иако беше од затворен тип. Тие организираа венчавање со матичар и свадбена забава на необична локација, во еден од воените хангари на аеродромот Стенковец, специјално приспособен за оваа пригода.
Една од најуникатните венчавки или свадби во 2017, ги имаа пејачката Сара Мејс и водителот Димитар Атанасовски. Во нивен стил сѐ беше уникатно на приватната свадбена забава. Сара со посебна венчаница, пердуви и долга коса, Димитар со мотор по неа наместо со автомобил.
Во март годинава ги ставија потписите за стапување во граѓански брак, а во септември портпаролот на ВМРО ДПМНЕ Димче Арсовски и неговата сопруга Соња направија и свадба. Главен гостин беше токму нивното синче, едногодишниот Давид.
Во познат скопски ресторан неодамна свадба направи и министерот Благој Бочварски, а неговиот сопартиец Љупчо Николовски на вечна љубов се заколна во март 2020.
Меѓу водителките и новинарките кои стапија во брак, а ги проследивме беа и Јана Серафимова, Јелена Богојевиќ и Анастасија Илиевски.
Јана која е вљубена во спортот и на „Телма“ ја води емисијата „Ферплеј со Јана“, срцето му го предаде на Горан Петровски. Го склучија граѓанскиот брак минатата година, и уште лани, Јана за Женски магазин рече дека стрпливо ќе чека да попуштат рестриктивните мерки поради ковид, а големата забава ја планира за на лето. Таа накратко ни ја раскажа љубовната приказна со Горан.
-Се запознавме на „Д фестивал“, работно бевме таму и двајцата. Организаторите на фестивалот дојдоа на свадбата и се смеевме - стројници ни се хаххаа! Другари ни се. Кај Горан, најмногу го сакам тоа што е добар и чесен, секоаш насмеан, сите го знаат по смешките и по многу добрата смисла за хумор. Креативен е 24/7 да ги смее сите“, рече Јана за својот сопруг.
Водителката Јелена на романтичен начин се сврши со Срѓан во Крушево. Од почеток знаевме дека сме еден за друг, рече таа.
-Немам зборови со кои можам да ја опишам среќата и сите изливи на емоции кои надојдоа по запросувањето во преубавото Крушево... Едноставно од самиот почеток знаевме и бевме сигурни дека сме еден за друг, сфативме дека сме копнееле по ваква сродност и сме се барале потсвесно и за првпат во животот пронајдовме и доживеавме ваква љубов. Се запознавме во вистинско време, неочекувано и брзо се зближивме, а чувствата, разумот, заедничките погледи и ставови беа пресудни да решиме цврсто дека сакаме да го поминеме животот заедно, па и сите наредни ако постојат“, ни изјави водителката тогаш.
Во венчаница од соништата, љубовта со брак во Охрид ја крунисаа и водителката Анастасија и Богдан Илиевски.
Со бебе на пат во 2020 се ожени и ракометарот Столе Стоилов. Судбоносното „ДА“ младиот брачен пар го заокружи со граѓански брак. Столе и Деница со најблиските во локал во Скопје прославија за новото поглавје во нивниот живот.
Во 2018 година се омажи и поп-пејачката Симона Поповска, за својот долгогодишен дечко, бизнисменот Крис Поповски. Свадбата беше во јуни, а Симона носеше дводелен невестински фустан. Таа сега е мајка на две дечиња.
Пејачот Александар Белов се ожени со Србинка. Белов ја изненади Јелена, ја побара за жена на како што вели едно од неговите омилени места, манастирот Свети Наум во Охрид. Белов во Крагуевац, каде што неколку години живее со својата сегашна сопруга Јелена, направи свадба на која имаше многу гости од Македонија и од Србија.
Стефан Богоев и Ивана Анѓелковска, во септември 2018 направија свадбена веселба на која присуствуваа бројни јавни личности.
Стефан ја запроси својата долгогодишна девојка во февруари годинава. За свечениот момент одбра симболичен датум - нејзиниот роденден. Тогаш, за „Женски Магазин“ ја раскажа својата љубовна приказна.
„Се запознавме пред скоро девет години. Пред тоа воопшто не се познававме. Од првиот момент имаше искра и почнавме интензивно да комуницираме. Почнавме и да се гледаме, беше убаво и да бидам искрен уште оттогаш имав претчувство дека ќе трае. Оттогаш, покрај љубовта станавме и најдобри другари, партнери. Споделуваме сѐ“, ни раскажа Богоев.
Разводи и крај на љубовта
Иако разводите ги имаше во многу помал број потсетуваме дека се разделија Перо и Ружица Антиќ, Маја Ристовска и Јован Костовски, Коки Јанков и Росана, Даниел Кајмакоски и Кристина Димитриевска, Лозано и Савка ја откажаа свадбата, а се разделија и Александра Накова и кошаркарот Гајдаџиев. Се разведоа Елена Велевска и Маријан.
Во февруари 2020, Елена Велевска, по неколку обиди да си сочува бракот со охриѓанецот Маријан, и по неколку објави од медумите дека се разведува претходниве две години, официјално објави дека се разделува од сопугот.
„Јас многу се трудев да го сочувам бракот, но не успеав. Ќе ви кажам кога ќе биде официјално, во тек е постапката за развод“, изјави Велевска за медиумите тогаш. Таа додаде дека двете ќерки и синот ѝ се најголемата поддршка, и оти љубовта не траела вечно како во бајките, а разводот не е ништо страшно во денешно време.
Манекенката Кристина Димитријевска и пејачот Даниел Кајмаковски исто така ставија крај на бракот во 2020. Пејачот продолжи да работи и живее во Белград, додека неговата поранешна сопруга, остана во земјава и почна да реди успеси во нејзината кариера. Заедно имаат син.
Маленко рекордер, се разведе по 4-ти пат во 2020
Поранешниот македонски пливач Александар Маленко се разведе по четврти пат. Тој на утринската емисија на Алфа најави дека веќе некое време не живее заедно со сопругата Фанче од Охрид со која има два сина. Маленко зад себе има четири брака и пет деца.
Тој подоцна изјави дека со сопругата не живее заедно веќе една ипол година. „Со Фанче решивме да се разделиме пред година ипол и досега никаде ништо не сум спомнал. Да, бевме седум години во брак, имаме две синчиња и бракот заврши со пријателска разделба, без трауми. Нема драма, нема помпезност“, изјави тогаш Маленко .
Емилија Розман се сврши по еден ден познанство и се раздели од Стефан.
По само 24 часа познаство, познатата манекенка и Мис на Македонија Емилија Розман ја прифати понудата за брак од Стефан Ангеловски и набрзо стави крај на оваа љубов. Веќе во септември 2020, Емилија ги избриша сите заеднички фотографии од социјалните мрежи и се пошегува на своја сметка: „Подарувам венчаница, два дена носена“, напиша Емилија.
Во јуни 2019 крај на љубовта ставија поранешниот македонскиот кошаркарски репрезентативец, Перо Антиќ, и неговата сопруга Ружица.
- Разводот е веќе официјализиран, а по 13 години заедница, остануваат во коректни односи поради трите сина - ни открија тогаш блиски пријатели на познатата двојка.
Лозано и Савка ја откажаа свадбата во 2017
По девет години врска, поп-пејачот Влатко Лозаноски-Лозано на крајот од летото 2017 ја раскина врската и свршувачката со Савка Грачанин, втора придружничка за Мис на Македонија во 2013 година. Лозано и Савка се свршија во декември во 2015 година, кога тој ја побара за жена на нејзиниот роденден. Блиски пријатели на двојката изјавија дека Савка се отселила од нивниот стан, а свадбата ја откажале.
Накова се разведе од кошаркарот Гајдаџиев
Манекенката Александра Накова, по две години брак, во 2017 се разведе од кошаркарот Никола Гајдаџиев. Уште пред да се објави веста за разводот, Александра и Никола не живееле заедно, но разделбата ја криеле од јавноста.
Ирена Ставрова
Можеби ќе ве интересира
